AL
EN

Naya

Naya, Projekt i Ri

Naya, një vizion ambicioz, besuar studios ndërkombëtare hollandeze OMA, ky projekt do të pozicionohet si një portë hyrëse drejt qytetit të Tiranës. E vendosur pranë unazës së madhe rrugore, kjo hapësirë shndërrohet në një pikë strategjike ku infrastruktura moderne takon peizazhin, dhe ku arkitektura nuk është thjesht ndërtim, por një eksperiencë e kuruar jetese.

Më shumë rreth projektit.

Naya pozicionohet pranë një "viadukti" të
ngritur me kolona nga toka dhe me qarkullim intensiv, duke hapur horizonte të gjera vizuale mbi lagjen përreth, dhe duke krijuar një dialog të vazhdueshëm mes jetës urbane dhe peizazhit të përditshëm. Projekti do të zhvillohet në një truall me sipërfaqe prej 7 648 m2, me një topografi me pjerrësi të moderuar prej 9% dhe kufizohet në perëndim nga rruga "Gjon Simoni" dhe në veri nga rruga "Vilson Blloshmi". Naya do të ofrojë përreth 380 apartamente me sipërfaqe racionale, njësi shërbimi dhe parkime nëntokë, duke i lënë kështu hapësirat mbi tokë, totalisht të lira nga automjetet dhe të shfrytëzueshme nga banorët e kompleksit për parqe, gjelbërim dhe rekreacion.

Topografia

Objektet

Projekti Naya konceptohet si një kompozim i rafinuar urban me katër blloqe banimi, të vendosura në një konfigurim të frymëzuar nga logjika e fushës së shahut, një balancë e kujdesshme mes ritmit, hapësirës boshe dhe asaj të ndërtuar. Forma e objekteve lind natyrshëm nga leximi i kontekstit informal përreth, duke e përkthyer atë në një gjuhë arkitektonike të qartë dhe bashkëkohore. Në këtë mënyrë, Naya nuk qëndron thjesht si një ndërhyrje e re, por si një akt që formalizon dhe strukturon peizazhin urban ekzistues. Projekti bëhet pjesë organike e qytetit, duke krijuar një vazhdimësi të ndjeshme me kontekstin, ndërsa njëkohësisht ofron hapësira të brendshme cilësore, të menduara për të qëndruar, për të luajtur dhe për të jetuar me dinjitet dhe identitet.

Ashtu si në projektet tona të mëparshme, ku gjurma jonë dalluese materializohet përmes përdorimit të ngjyrës në fasada dhe në kornizat e dritareve, edhe në projektin Naya, ngjyra shndërrohet në një element identitar. Një paletë e pasur me tone vibrante dhe të guximshme do të ndërtojë karakterin vizual të kompleksit, duke i dhënë çdo blloku një ritëm të veçantë dhe një prezencë të dallueshme në peizazhin urban.
Ngjyrat nuk janë thjesht dekor; ato janë një gjuhë që komunikon energji, gjallëri dhe individualitet, duke krijuar një atmosferë të ngrohtë dhe bashkëkohore që fton banorët të përjetojnë hapësirën si një vend unik dhe plot identitet.

Piazza/ Agora Urbane

Më shumë se një hapësirë kalimi, agora/ piazza urbane do të shndërrohet në zemrën e projektit, një vend takimi, ndërveprimi dhe përjetimi, ku dinamika e përditshme merr formë dhe hapësirë. Njëkohësisht, ajo përfaqëson boshtin kryesor mbi të cilin ndërtohet dhe zhvillohet i gjithë projekti, duke u trajtuar si një nga elementet më të forta dhe më përfaqësuese të tij, një strukturë hapësinore që organizon, lidh dhe i jep kuptim tërësisë arkitektonike.
Agoraja/ Pizza urbane do të konceptohet si një hapësirë fleksibël që lidh në mënyrë organike të katër blloqet e banimit, hyrjet e tyre dhe zonat e shërbimeve tregtare. Duke u alternuar midis hapësirave të mbuluara dhe atyre të hapura, ajo do të zhvillohet në nivele të ndryshme, duke u ngjitur gradualisht në formën e një tarrace dhe duke krijuar përvoja të larmishme hapësinore dhe mikroklima të dallueshme.